Juoiguuh finnij nuotâid: Emil Kárlsen máttááttâlâi uđđâ tááiđu stuorrâ produktio várás

Ovllá solisti já uáiviroolâ niävttár Emil Kárlsen muštâl sahhiittâlmist maid sun lii oppâm ooppera hárjuttâsâin. Sun ij ovdâmerkkân ovdil lah máttám luuhâđ nuotâid, mut ko lii porgâm oopperain te sun lii álgám iberdij taid.

Juáigusijn ij táválávt lah nuottim. Kárlsen lii nuottim puoh juoiguuh maid oopperast puáhtá kuullâđ. Ärbivuáválâš ooppera já juoigâm lasseen lyevdi alne puáhtá kuullâđ tai stijlâi siävuttâs. Kárlsen stijlâ lii ovtâstâh taid kuohtuid.

— Muu mielâst taah kyehti stiijlâ tuáimih pyereest oohtân, Kárlsen muštâl.

Ovllá ij lah áinoo produktio mast juoigâm lii lavkkim uđđâ já stuorrâ lyevdi oolâ. Taažâ aalmugooppera já baletti oovdânpuovtij juoigâmbaletti Láhppon/Lost 2025 roovvâdmáánust. Meiddei Ruotâ kunâgâslii oopperast láá ovdâstâm juoigâm já ooppera Eatnama Váibmu “Eennâm váimu” 2025 skammâmáánust.

Kárlsen arvâl, ete juoigâm lii šoddâm ain tobdosumosân ko jyeigeeh jieš láá kavnâm uđđâ areenaid já luovijd. Siämmáá ääigi uárjimaailm lii álgám kiddiistuđ sämmilii kulttuurist ain eenâb.

Keejâ ubâ sahhiittâllâm videost: https://www.youtube.com/watch?v=J-BEUMU-4fo