Ovlá – Anárašgiella

Ooppera ruotâsij ucâmist já staatâ jođettem sämmilij suárdimist

Ovlá lii ooppera tuotâvuođâ lappuumist já stuorrâ ohtuunisvuođâst. Tast, ko jieijâs moonnâmääigi já kulttuur ruotâseh kiškojeh pittážin. Ko páárnáš váldoo meddâl vanhimijnis já páguttuvvoo asodâhškoovlân, kost sun teivâd vieres kielâ já kulttuur. Feeriimist šadda ohtuu pääccim já hilgom trauma. Uámi tahhoo vieresin já páárnáš šadda hepânâššâđ tom, mii sun lii. Vieresvuođâ tobdoost šadda identiteet, mii ij addel ráávhu.   

Mii muštâlus almai, suddâdempolitiik uhre, lii läpittâm maidnii tehálijd, maid sun lii hävdidâm já irâttâm váldáttiđ: kii sun lii. Rähisvuotâ iällát haalu maccâđ jieijâs ruotâsáid já maaccât Oovlán tobdo, ete olmooš ij pyevti tuše meridiđ muttuđ nubben. Puáhtá-uv Ovlá joskâđ vááldátmist já puáhtá-uv sun meridiđ mušteškyettiđ? 

Ovlá lii čáállám sämmilâš čáitáldâhčällee Juho-Sire/Siri Broch Johansen, nuottim syemmilâš nuotâsteijee Cecilia Damström konsultnis sämmilii muusik äššitobdee Ánndaris/ Anders Rimpi, já stivrim Oulu teatter stivrejeijee Heta Haanperä. Ooppera orkesterin tuáimá Oulu Sinfonia já kapelmiäštárin Oulu Sinfonia pajekapelmiäštár Rumon Gamba. 

Mij kuullâp muusikist sämmilii luándu stuorrâ já timmâ jienâenâdâhhân. Muččâdvuođâ tyehin kuávváá kuittâg rašes muštâlus taistâlmist: kolonialistsiih vääldih tegu Suomâ láá rievvim sämmilii algâaalmugist sii harmonisii ohtâvuođâ luándun já viggâm pieijâđ ráhtulistume já lájádâslistume ton sajan. Taat ruossâlâsvuotâ spejâlistuvvoo muusikist, mast luándu rijjâ kulgijdem asâttuvá äštee riitmâ, oornig já korâsvuođâ ráhtusij vuástá. Orkester vuárusavâstâllâm kuávdoo pajaneh sämmilij jyeigei jieijâs jienah, moh kovvejeh ohtâgâs siđhesvuođâ já vyeimi taistâliđ maasâd pärnivuođâst rievvejum identiteet.   

Nuotâsteijee Cecilia Damström nuotâst muusik aldaas ohtsâšpargoost sämmilij musikkárijguin, kiäh nuotâsteh ooppera puoh luođijd. Taah lyeđeh suddâluveh nuotâstâsân ton kuávdášlâš uássin, kunnijâtteh sämmilij kulttuuräärbi já ponjeh sii jienâid tyejeest ohtâsâš muusiklâš olgospyehtimân.  

Tyeji paajeed Oulu teatter stuorrâ čáitáldâhlyeve oolâ Tave-enâmij áinoo algâaalmug, sämmilij keččâmkuávlu sehe taid hirmâd rašes čuávumušâid, moh vaigutteh staatâ jođettem suárdim tiet ain uđđâ sämisuhâpuolváid.  

Ooppera váimusist lii oovtâ tááhust tiäđujyehim já ovdâsvástádâs väldim staatâ jođettem puástuvuođâin, já nube tááhust sämmilij jieijâs feerimij oovdân pajedem. Siämmást ko tyeji kiäččá ármuttemeht siärvádâhlijd ráhtusijd já olgoštem, tot kiäččá ovtâskâs ulmuu läđisvuođáin. Ovlá-ooppera lii fiktiivlâš maainâs, mutâ puoh mii tast tábáhtuvá lii motomin tábáhtum kiäsnii Suomâ, Ruotâ, Taažâ já Ruošâ peln Sämienâmist. 

Produktio kyessivuávájeijen tuáimih sämmiliih taidâreh: lyevihämmejeijen Geir Tore Holm, pivtâshämmejeijen Helmi Hagelin já čuovâhämmejeijen Øystein Heitmann. Ooppera jienâvuáváámist västid Oulu teatter Jari Niemi. 

Ooppera olášuttoo ohtsâšpargoost Oulu Sinfoniain, Sämmilij aalmuglâšteatter Beaivvášáin já Oulu2026:in. 

Oulu lii Euroop kulttuuruáivikaavpug ive 2026. Ovlá lii Oulu2026-kulttuurohjelm já kulttuuršoŋŋâdâhnubástus uási. 

Čáitáldâhčällee Juho-Sire/Siri Broch Johansen  

Juho-Sire/Siri Broch Johansen (š. 1967) lii sämmilâš čáitáldâhčällee, kirječällee, šuoŋârähtee já aktivist. Sun lii valmâštum teattertaiđuu maisterin já parga válduääšist čáitáldâhčällen. Broch Johansen lii vuáittám Sämirääđi kirjálâšvuođâpalhâšume kuohtii jieijâs nuorâiromanijguin. Sun lii čáállám esseekirje Reivvet kommišuvdnii (“Reeivah komission”, jurgâlhánnáá, 2020) mast sun vuájudâđâi tuotâvuotâ- já sovâdâttâmkomissio ruossâlâsvuođâid iällááttâm fáddáid.  
 

Nuotâsteijee Cecilia Damström   

Nuotâsteijee Cecilia Damström (š. 1988) lii pajanâm ohtân Suomâ pivnohumos nuotâsteijein já stuorrâ uási syemmilijn sinfoniaorkesterijn já festivaalijn láá čuojâttâm suu muusik. Sust lii äppi já haalu väldiđ šuoŋâidiskuin pele siärvádâhláid fáddáid sehe noonâ dramaturgia fiättu. Sun vuoitij ive 2018 Ive párnáiooppera -palhâšume Dumma Kungen -oopperainis já nuotâstij siämmáá ive Suomâ Aalmuglâšoopperan vuossâmuu ruotâkielâlii škovlâpárnášooppera Djurens planet. Damström oopâi nuotâstem Tampere áámmátollâškoovlâst já Malmö muusikakatemiast. Damström vuoitij Teosto-palhâšume ive 2022 orkestertuojijnis ICE já suu orkestertyeji Extinctions lâi iävtukkâssân Tave-enâmij rääđi muusikpalhâšumán 2024. 

Info

Vuosâeehid 16.1.2026 
Stuorrâ lyevi  
Liipuh 
A-kategoria 93 € / 88 €/ 79 € 
B-kategoria 88 € / 83 € / 75 € 
C-kategoria 83 € / 78 € / 71 € 
 
Nuotâstem: Cecilia Damström  
Libretto: Juho-Sire/Siri Broch Johansen   
Stivrim: Heta Haanperä  
Kapelmiäštár: Rumon Gamba 
Orkester: Oulu Sinfonia  
Lyevihammim: Geir Tore Holm  
Pivtâshammim: Helmi Hagelin  
Jienâvuávám: Jari Niemi  
Čuovâvuávám: Øystein Heitmann 
Nuotâstem konsult: Ánndaris / Anders Rimpi   
Libretto konsult: Oda Radoor   

Válduroolijn: Emil Kárlsen